الأمهات اللى تعبانة مع ولادها بسبب القرائية انا هريحكوا منها خالص وبعد الشرح اللى عندها استفسار انا فى الخدمة 
أولا القرائية مقسمة لثلاث أجزاء عشان بس مانخلطش الأمور ببعضها
أولا الصوتيات
ثانيا المفردات
ثالثا الفهم القرائى
(أولا الصوتيات) تشمل إتقان مهارة التفريق بين اللام الشمسية والقمرية والشدة والتنوين والمدود والتحليل إلى مقاطع صوتية
وبالنسبة للتحليل أحب أوضح الكلمات اللى فيها إشكال احنا اولا لو فهمنا أن الصوت عبارة عن حرف + حركة (فتحة أو ضمه أو كسرة) ده هيسهل علينا كتير
خلينا متفقين الأول إن المقطع الصوتى لازم يكون فيه حرف عليه حركة ده أساسى وممكن يرتبط معاه حرف ساكن أو حرف مد يعنى المقاطع الصوتية تلات أنواع اما مقطع ساكن ( حرف عليه حركة + حرف ساكن ) أو مقطع متحرك (حرف واحد عليه حركة)مقطع ممدود (حرف عليه حركة +حرف مد)
والمقطع الواحد ممكن يكون حرف أو اتنين أو تلاتة وممكن كمان أربعة😱 اه أربعة وده نخليه سؤال ليكم ادونى امثلة 😃 انا هديكو بس أمثلة على المقطع المكون من حرف حرفين وتلاتة وانتو تجيبوا مثال المقطع المكون من أربعة حروف 👍
المدرسة: ال/ مد/ ر / س /ة
الشارع: الش/ شا / ر /ع
(ثانيا المفردات)تعنى فهم الكلمات الجديدة باستخدام عدة استراتيجيات وهى كالتالى
(شبكة المفردات): كل مايتعلق بالكلمة أو مايرتبط فى ذهن الطفل بالكلمة مثل شبكة كلمة مدرسة. . مدرس.. فصول .. فناء... كتب. ..الخ
(خريطة الكلمة )نأتي فيها بمعنى الكلمة ومضادها ونوعها(اسم أم فعل) ووضعها فى جملة
(المعانى المتعددة): كلمة لها عدة معانى وتفهم من خلال الجملة مثال: اكتب معنى كلمة يروى فى الجمل الآتية
يروى جدى لى قصة______يحكى
يروى الفلاح الحقل_______ يسقى
(مفاتيح السياق)اكتب معنى كلمة شاهدنا فى الجملة الاتية من خلال مفاتيح السياق
شاهدنا الورد الأحمر ____ رأينا
والكلمات المفتاحية هنا هتكون كلمة الأحمر لأن اللون يدل ع الرؤية
(عائلة الكلمة ) اى كتابة مشتقات الكلمة مثال كلمة يشاهد. . شاهد .. مشاهدة .... نشاهد... مشهد .. أشاهد... تشاهد....
(ثالثا الفهم القرائى )استراتيجية عناصر القصة هى فقط المقررة على التلاميذ
ويأتى السؤال كالتالى
قصة مكتوبة سواء من الدروس المقررة أو من خارج المنهج ويطلب تحديد عناصر القصة
الزمان والمكان والشخصيات وأهم حدث بالقصة
مثال على درس على الشاطئ
المكان شاطئ البحر
الزمان فى الصيف أو فى الصباح
الشخصيات باسم وأصحابه
أهم حدث الأطفال يلعبون على شاطئ البحر
وعلى فكرة ده مش كلام مقدس الغرض من القرائية ان الطفل يبدع بمعنى أن الشبكة مثلا اى كلمة هيكتبها تخص الكلمة المطلوبة من قريب أو بعيد بتعتبر صح
زمن القصة حسب ماهو فهم بردو بيكون صح وأهم حدث ده يرجع لرأى الطفل بردو اى جملة من الفقرة هيكتبها هتبقى صح الموضوع بسيط جدا ماتعقدوش الولاد😀 واعتبروها لعبة بالتوفيق يا أمهات 💕
تعليقات
ليست هناك تعليقات
إرسال تعليق