كانوا زمان بيسموها اعجاب او استلطاف دلوقتي الوضع اختلف تماما ؛ والعلامات كمان اختلفت شوية …الكراش مبقاش يلمح من بعيد لبعيد ولا بيبعت رقم تليفونه علي منديل زي عماد حمدي ….دي 5 نقط غالبا هتلاقيهم في الكراش بتاعك :
1- “بحب البنت الذكية”
هيمدح ذكائك عالفاضية وعالمليانة، اللى هو حتى لو بتتكلمى فى حاجة بديهية ومش محتاجة ذكاء هتلاقيه بيقولك “ودى بقى أكتر حاجة بحبها فيكي، انك ذكية مش زى باقى البنات”
2- “أنا بحب ستايلك أوى”
هتلاقيه من تانى مرة يشوفك واخد باله من ستايلك هيقولك انه بيحبه، فلو انتِ مبتلبسيش فورمال مثلا ومبتحطيش ميك أب هتلاقيه بيقولك “أنا بحب ذوقك فى لبسك انه ميكونش متكلف كده وبسيط وكمان أنا بحب البنت اللى مبتحطش ميك أب، دى أحلى حاجة فيكي” ولو كنتى عكس كده وبتحطي ميك أب ودايما شيك كأنك رايحة مناسبة مهمة كان هيقولك برضه انه بيحب الستايل ده!
3- “أنا عرفت بنات أقل من عدد شعر راسى بحاجة بسيطة”
هينتهز أى فرصة عشان يكلمك عن ماضيه ويقولك قد ايه هو لف ودار وشاف وعرف بنات كتير جدا فخلاص حصل عنده اكتفاء من معرفة البنات والتسلية وده خلاه قد ايه ينضج ومعايير اختياراته لأى بنت فى علاقة جديدة بتختلف وبالتالى هو بيدوّر على دماغ يناقشها وتكون جنبه أكتر من مجرد بنت يقضى وقت لطيف معاها.. فى جملة شهيرة عموما وتعليقا على البوقين دول بره بتقول “عدد العلاقات اللى بيقولهالك الولد بتقسميها على تلاتة وبيكون هو ده الرقم الحقيقي” وبالنسبالى أنا مبعرفش أثق فى الولد اللى بيتباهى أو بمعني تانى بينخع فى عدد علاقاته اللى قبلى.. ودااايما بيبان مهما استنصحتوا فى إلقاء الكدبة
4- ياللى وسطك وسط كمانجة وعودك مرسوم عالسنجة
أكيد مفيش حاجة عيب فى انه يمدح شكلك، لكن المريب واللى لازم يخليكي تشُكى فى نواياه ان النسبة الأكبر من تعليقاته تكون على شكلك أو على جسمك عشان نكون أكثر تحديدا فتلاقيه بيقولك “انتِ بتعملى سكواتس؟ عموما لو بتعملى استمرى” أو “لو مبتعمليش اعملى” . شكرا على النصيحة طبعا وكل حاجة بس مانا مسيري هكبر فى السن ويبقى عندى تجاعيد وكل ده يترهل لامؤاخذه، ساعتها هتسيبنى وتروح لنيكي ميناج مثلا ولا ايه؟!
5- الجيوب بتتلاقى
ودى حاجة مش دائمة الحدوث صحيح لكنها بتحصل وما بين كل 10 حالات مثلا هتلاقى 4 منهم على الأقل حصلت معاهم؛ فتلاقى الواحدة من دول قاعدة فى أمان الله فى كافيه مع الكراش وتلاقيه وقت الحساب مسكته الأرتيكاريا وهوب يقولها ايه ده أنا نسيت المحفظة فتضطر هى تحاسب طبعا. بس بما ان الموضوع ده اتعرف، فالجديد بقى انه بيطلع الفلوس اللى معاه ويعمل كأنه وقع فى حسبة برما وان اللى معاه مش هيكمل فهى تاخد بالها طبعا وتسأله: عايز فلوس؟ وإجابة السؤال ده من الناحية التانية عمرها ما كانت لأ!
أنا مش مبقولش ان الطبيعي انه هيصرف عليها كل ما هينزلوا، بالعكس هى أصلا مش مُلزَمة منه ده غير ان طالما هى بتشتغل زيها زيه يبقى متصرفش ليه يعني! والأهم من كل ده طالما بنطالب بالمساواه فجيس وات؟ ده جزء من المساواه.. آه وربنا! لكن اللى بتكلم فيه هو التحوير أولا والاستنطاع المتكرر ثانيا.
تعليقات
ليست هناك تعليقات
إرسال تعليق