أعلنت شركة هواووي عن هاتفها  huawei nova 3i ، وذلك في ظل الحرب المستمرة علي الهواتف في الفئة المتوسطة، ولهذا ننقل لكم في هذا المقال ريفيو كامل لهاتف هواووي نوفا 3i بشرح وافي للمواصفات التقنية للهاتف وتفنيد بالتفصيل للعيوب والمميزات للهاتف في هذه الفئة السعرية، وفي نهاية المقال ننشر لكم السعر النهائي لهاتف هواووي نوفا في مصر وترشيحات الشراء.

لو فاكر لما نزل النوفا بلس فى 2016، كنا نزلناله ريفيو بردو .. الموبايل دا كان من حيث جودة التصنيع تحسه جهاز فلاج شيب .. لكن من حيث المواصفات كان ينتمى للفئة المتوسطه .. ولكن تسعير الجهاز في وقتها كان في النص بين الفئة المتوسطه و فئة الفلاجشيب ودا اللى خلى ناس كتير متتحمسش انها تشتريه خصوصا انها شايفه موبايلات مقاربه ليه جدا في المواصفات ولكن بسعر اقل ودا فى النهايه انعكس على مبيعات الجهاز اللى كانت قليله فعلا ..

المره دى واوى قررت تعمل حركة حلوه .. وبدل ما تعلن عن جهاز نوفا واحد .. أعلنت عن جهازين .. واحد ينتمى لفئة الفلاجشيب بمواصفاته ودا اللى هو النوفا 3 .. اما التانى ينتمى للفئة المتوسطه و دا ال نوفا 3i و هو اللى معانا في الريفيو النهارده .. جربنا الموبايل لمده اكتر من أسبوعين و دى كل كبيره و صغيره فيه 😉

محتويات علبة هاتف huawei nova 3i هوواي نوفا 3i 

  • - الموبايل الازرق الموف اللى واوى مسامياه Iris purple :D 
  • - شاحن 2 امبير 
  • - وصلة USB عادية 
  • - دبوس للشريحة
  • - سماعة هاند فرى 
  • - سكرين للموبايل 
  • - جراب سيليكون شفاف 

- حاجه مش مهمه كمان مش هقولها :"D
ودى يمكن اكتر نقطه واوى ركزت عليها في الموبايل دا لان تصميم

تصميم موبايل  huawei nova 3i هوواي نوفا 3

الموبايل ممتاااز ولونه تحفة .. مفيش غير حاجه صغننه اللى مش عاجبانى و هقولها في الأخر ..
ولكن كل حاجه في تصميم الموبايل تحفه فعلا .. الفريم المعدن الأزرق .. الشاشه اللى واخده كيرف 2.5D على الجوانب .. ظهر الجهاز اللى لونه موف على ازرق واللى بيتغير على حسب زاوية ومكان الإضائة .. مسكة الجهاز في ايدك انت فعلا حاسس انك ماسك جهاز فلاجشيب بريميم جدا جدا

وش الجهاز هتلاقى شاشه الموبايل اللى الحواف بتاعتها على الجناب و من فوق صغيره جدا .. ومن تحت اكبر شويه ولكن بشكل مش مزعج اطلاقا .. الحافه اللى تحت اصغر من اللى موجوده في ال P20 pro أصلا ..
النوتش اللى فوق كبيره شويه و دى الحاجه اللى قولتلكوا انها مش عاجبانى قوى .. عشان مبيقاش فيه مكان لظهور اكتر من 2 من ايقونات الإشعارات .. لكن الموضوع مش مزعج قوى وهتتعود عليه ..

دا غير ان فيه سبب منطقى للنوتش الكبيره .. و هي وجود كاميرتين قدام مش كاميرا واحده .. ووسطيهم سماعة المكالمات .. والمستشعرات موجوده جنب السماعه .. دا غير ان برغم ان المكان ضيق واوى أصرت انها تضيف لمبة الإشعارات .. و موجوده تحت السماعه على الليمين .. والحقيقه مختش بالى منها الا نورت لانها مش ظاهره على الإطلاق وهى مطفيه
اما ظهر الجهاز ف دا اللى غريب الحقيقه .. لونه متدرج من ازرق لموف و درجة التدرج دى بتختلف على حسب زاوية الإضاءه نفسها ..

ظهر الجهاز فعلا حلو جدا لدرجة انك هتفكر انك متستخدمش الجراب اللى مع الجهاز عشان تستمتع باللون بتاعه 😍😍

في ظهر الجهاز من فوق الكاميرتين و تحتهم الفلاش
و تحت شويه في النص البصمه

على يمين الجهاز زرار الباور و ازرار الصوت و على الشمال مكان الشريحتين او شريحه وكارت ميمورى ومن فوق مش هتلاقى الا المايك التانى بتاع عزل الضوضاء

الجهاز من تحت بقى فيه مدخل الشاحن و مايك المكالمات و الحمد لله منفذ ال 3.5 مللى موجود :D

وأخيرا السماعه اللى بالمناسبه صوتها كويس.. اعلى من المتوسط و جودة الصوت ممتازه ولكن الصوت هتلاقيه طالع فلات شويه ودا المتوقع لان مفيش موبايل في الفئة دى بيقدم تجربه صوتيه كويسه فعلا زى ما بنشوف في أجهزة الفلاجشيب ..

مواصفات موبايل  huawei nova 3i هوواي نوفا 

تعالا بقى للشاشه اللى حجمها 6.3 بوصه بأبعاد 19.5:9 ودا عشان النوتش .. الشاشه دى دقتها FHD+ وتحديدا 2340x1080

نوع شاشة الجهاز IPS .. درجة اضائتها ممتازه جدا في ظروف الإضائة العاديه ولكن في الشمس هتلاقيها غامقة شويه ..

درجه الوان الشاشه ممتازه ولكن لما تطلع الجهاز من العلبه هتلاقى الشاشه لونها مزرق شويه و دا بسبب انها معموله على نظام الوان vivid .. مجرد ما هتختار Normal هتلاقى الوان الشاشه رجعت بشكل طبيعى جدا ..

زويا رؤية الشاشه كويسه جدا بس لما تبص عليها من الجوانب هتلاحظ ان الشاشه بتبقى اغمق حاجه بسيطه لكن درجات الألوان زى ما هي ف الموضوع دا مش هيأثر على تجربه استخدامك اطلاقا .. الشاشه بشكل عام ممتازه جدا جدا على الفئة السعريه دى
خلينى اقولك ان الجهاز دا مش بياخد خطين و كارت في نفس الوقت ولازم تضحى بخط منهم عشان تقدر تحط كارت ميمورى..
ولكن الحقيقه محدش هيحتاج يعمل دا لان ذاكرة الجهاز 128 جيجا ..

ودى حركه محترمه جدا من الشركه خصوصا ان مفيش أصلا اى جهاز في نفس الفئة السعريه دى بيقدم نفس الحجم من الذاكره..

ف عيش على الموبايل براحتك :D وحط الداتا اللى انت عاوزها من غير ما تفكر انك فى يوم من الايام هتشيل خط عشان تحط مكانه كارت ميمورى ..

على اى حال الشريحتين اللى في الجهاز بيشتغلوا على شبكات الجيل التانى و التالت و الرابع كمان ..

صوت المكالمات ممتاااز جدا و البلوتوث كمان و ال GPS ممتاز دا غير ان الموبايل فيه مستشعر البوصله ف لو انت لو بتستخدم الخرايط كتير هتلاقى تجربتك سلسه جدا و تقدر تعتمد على التليفون في الموضوع دا ..

بطارية موبايل huawei nova 3i هاتف هوواي نوفا 3

نخش بقى على البطاريه اللى حجمها 3340 مللي امبير .. في الأول هتحس انها صغيره شويه خصوصا ان في الفئة السعريه دى فيه اجهزه ببطاريه 4000 مللى امبير ..

الا ان أداء البطاريه كان افضل من توقعى .. لو انت بتستخدم الموبايل على الوايفاى هتوصل ل 7 ساعات سكرين اون تايم و انت مرتاح

اما لو فاتح نت من الخط مع شويه العاب تقيله هتلاقى ال Screen on time فى حدود ال 5 ساعات ..

ولو انت يادوب بتعمل مكالمات و استخدامك للموبايل خفيف ف البطاريه هتكمل معاك يومين عادى جدا ..

المشكله بقى ان الشاحن اللى جاى مع الموبايل مش شاحن سريع و لا الموبايل نفسه بيدعم الشحن السريع :(

الشاحن قوتة 2 امبير و شحنلى الموبايل من 0 ل 100% في ساعتين و 45 دقيقه .. او 3 ساعات لو انت بتستخدم الموبايل ..
ودى الحقيقه مده طويله كنت أتمنى لو تكون اقل من كدا

لكن يعنى الحمد لله ان اداء البطاريه كويس وبيكمل معاك لأخر اليوم عشان تحط الموبايل على الشحن و تسيبه ياخد وقته و تروح تنام

اندرويد هاتف  huawei nova 3i هوواي نوفا 3

الموبايل دا جاى بإصدار اندرويد اوريو 8.1 وعليه واجهة واوى EMUI 8.2
الواجهة دى هي اللى موجوده على اجهزه الفلاجشيب بتاعة الشركه و دا ممتاز جدا، الواجهة حصل فيها تحسينات كتير على السلاسه و استهلاك الرام و تجربه الإستخدام بشكل عام .. وبسبب التحسينات دى هتلاقى أداء الموبايل ممتاز جدا بتجربه سلسله تكاد انها تقرب من تجربه اجهزه الفلاجشيب .. ودا راجع كمان للمعالج الجديد كيرين 710 بجانب التحسينات اللى فى الواجهة نفسها ..

الواجهة فيها مميزات كتير زى Split screen و اللى تقدر من خلالها انك تستخدم برنامجين فى نفس الوقت و ميزة App Twin اللى تقدر تعمل من خلالها نسختين من برنامج الفيسبوك او الواتساب ..
دا غير الحاجات اللى متعودين عليها من واوى زى الحركات اللى بتعملها بالبصمه زى تغيير الصور و تنزيل شريط اللإشعارات وخلافه

الواجهة كمان فيها ميزة ال Face unlock و الجهاز بيفتح بسرعة جدا .. غالبا مش بتلحق تشوف ال Lock screen أصلا .. البصمه كمان سرعتها كويسه جدا بس فيها لاج بسيط جدا عن أجهزة الفلاجشيب من واوى مش هتلاحظه لو مستخدمتش اجهزة فلاجشيب قبل كدا

واجهة الجهاز كمان فيها برامج كويسه جدا زى برنامج phone manager اللى بتقدر من تمسح المفات اللى مالهاش لازمه و تفضى الرام وكدا .. فيها كمان تطبيق الثيمات و اللى بيغير شكل التليفون كله تقريبا
وفيها كمان برنامج بينقلك البيانات من موبايلك القديم للجديد من خلال الوايفاي دايركت ف تقدر تنسخ كل ملفاتك والبرامج بتاعتك بالداتا بتاعتها في وقت قليل

الواجهة بشكل عام اتحسنت من حيث الثلاثه و الأداء وبقت تقدم تجربه افضل خصوصا مع مع المعالج الجديد كيرين 710 👍
النوفا 3i جاى بمعالج اول مره ينزل من واوى وهو الكيرين 710

معالج  هاتف huawei nova 3i موبايل هوواي نوفا 3

المعالج دا معتمد على دقة تصنيع 12 نانوميتر ويادوب الشركه اعلنت عنه من مده لا تتجاوز الشهرين و النوفا 3i اول جهاز ينزل بالمعالج دا

المعالج ثماني النواه .. اربعه منهم بتردد 2.2 جيجاهيرتز والأربعه التانيين بتردد 1.7

أداء المعالج الحقيقه ممتاز جدا واستهلاكه للطاقه قليل .. بص اداءه تقريبا زى ال سنابدراجون 660 او اقل منه بحاجه بسيطه ..

خد بالك ان النوفا اول جهاز ينزل بالمعالج دا و هتنزل اجهزه تانى في فئات سعره اقل حاجه بسيطه منه بنفس المعالج .. ف دا يديك فكره كدا عن أجهزة الشركه الجايه هتكون عامله ازاى..

مع التجربه الفعليه هتلاقى ان التنقل بين التطبيقات و سرعة فتحها ممتاز حتى مع البرامج التقيله، الأداء محترم جدا والجهاز تعرف فعلا تعتمد عليه

اداء المعالج دا مع الرامات ال 4 جيجا ... مدى تجربه مميزه حتى لما تفتح اكتر من تطبيق فى نفس الوقت ... مش هتلاقى برامج بتتأخر في الفتح او بتشتغل من جديد مره تانى الا قليل جدا او لما تفتح برامج كتير جدا على الجهاز فى نفس الوقت..

اما الألعاب ف الجهاز جاى بمعالج رسوميات اسمه MALI G51 MP4
انت تقريبا هتحس انك بتعلب على جهاز فلاجشيب .. مفيش فريمات بتقع ومفيش لاج او تضحية في مستوى الجرافيكس اللى بتشوفها الا في حالات قليله جدا تقريبا مش هتلاحظها الا لما تلزق الموبايل فى وشك عشان تشوف الجرافيكس بتاعة الألعاب حلوه ولا لأ 😂

كاميرا موبايل  huawei nova 3i هاتف هوواي نوفا 3 الامامية والخلفية

الكاميرا بقى و اللى بسببها حصل المشكله بتاعة الإعلان والصور اللى نزلتها ساره الشامى على انستجرام .. فخلينا نتكلم عن الكاميرا السيلفى اللى هما فى الحقيقه كاميرتين
الأساسيه 24 ميجابيكسل بفتحة عدسة 2.0
اما التانيه 2 ميجابيكسل بتستخدم لعزل الخلفيه
على اى حال أداء الكاميرا ممتاااز جدا .. وافضل من أجهزة فلاجشيب كتير .. على سبيل المثال الكاميرا السيلفى افضل من كاميرا ال oneplus 6 اللى احنا اصلا بنستخدمه دلوقتى !
ودا الصراحه فاجئنى !

الكاميرا الصبح أدائها ممتااااز جدا .. الصور واضحه و شارب بشكل كبير و لما بتشغل خاصيه ال HDR Pro مهما كانت ظروف الإضاءه مش حلوه او وراك إضائة قوية جدا زى السماء او الشمس الصوره بردو بتطلع حلوة و الموبايل بيوازن بين المنطاق اللى فيها مستويات اضاءه مختلفه ..

الكاميرا كمان فيها فيها حاجه اسمها AR Lens .. دى هتلاقى فيها حاجه زى الأنيموجى بتاعة ابل و ال Effects اللى موجود على سناب شات كمان .. عموما وانت بتجربها حاول تكون لوحدك عشان ميتقالش عليك عبيط 😂

الكاميرا كمان فيها خاصية ال Ai اللى بتقدر تشغلها او تقفلها زى ما انت عاوز .. الحقيقه من وجهة نظرى هي ما بتعملش حاجه الا انها تزود الألوان شويه ... وفى بعض الأماكن اللى الإضاءه فيها قليله بتكون الصور اللى شغال فيها خاصية ال Ai افضل شويه ومنوره اكتر ..

الغريب بقى في الكاميرا الأماميه انها مش بتقدر تصور فيديو الا HD
ودا الحقيقه مش فاهمه خصوصا ان إمكانيات الجهاز تسمحله انه يسجل FDH و ب 60 فريم في الثانيه زى ما موجود في الكاميرا الخلفيه فعلا .. ف يعنى الموضوع دا عليه علامات استفهام كتير وملقيتلهوش اجابه حتى الان
أما الكاميرا الخلفيه في الموبايل فهى بردو كاميرتين ..
الأولى بدقة 16 ميجابيكسل ودى بفتحة عدسة f2.2
والكاميرا التانيه 2 ميجابيكسل عشان العزل

أداء الكاميرا دا حيرنى شويه .. يمكن في ظروف الإضاءة القويه ممتاز والصور شارب و توزيع الإضاءه اكتر من ممتاز .. ولكن بليل في ظروف الإضاءه القليله أحيانا بتلاقى نويز كتير و أحيانا تانى مش بتلاقيها بنفس الكميه دى .. دا غير ان تفاصيل الصوره بتبقى ناعمه بشكل ملحوظ و دا بيخلى الصور مش شارب و لو عملت زووم ان هتلاحظ دا بسهوله جدا ..

انما بخصوص الفيديو ف الموبايل بيصور بدقة FHD ولحد 60 فريم في الثانيه وكمان فيها وضع تصوير بطيئ Slow motion بيقدر يصور لحد 480 فريم في الثانيه ..

الكاميرا كمان فيها مميزات زى اللى موجوده في الكاميرا الأماميه اللى منها ال Ai و ال HDR دا غير أوضاع تصوير البورتريه زى ال 3D Lighting و ال Bokeh effect

العزل بقى في الكاميرا بيتم بشكل كويس جدا في ظروف الإضائه القويه بنسبة غلطات قليله جدا .. انما في ظروف الإضاءة الضعيفه مش هيطلعلك الصور اللى انت كنت مستنيها

هتلاقى هنا امثله لتصوير كاميرات الجهاز
http://bit.ly/2wkS5DD
الزتونة بقى و مميزات وعيوب الجهاز:

عيوب هاتف  huawei nova 3i موبايل هوواي نوفا 3

- اضائة الشاشه في الشمس
- مفيش شحن سريع
- الجهاز جاى ب مايكرو USB مش USB-C للأسف
- دقة تصوير الفيديو HD في الكاميرا الأماميه
- مفيش فلاش امامي "غالبا مكانش ليه مكان"

مميزات هاتف  huawei nova 3i موبايل هوواي نوفا 3

- وجود كل المستشعرات فيه وخصوصا الجايروسكوب اللى مكانش موجود في النوفا بلس اللى كان نزل من سنتين
- وجود جهاز في الفئة السعريه دى بذاكره 128 جيجا
- أداء الكاميرا الأماميه الممتاز جدا
- وجود لمبة الإشعارات
- لون الموبايل وتصميمه و الجوانب اللى واخده كيرف مخليه مسكة الجهاز مريحه جدا جدا
- دعم ال otg
- وجود ميزة ال Face Unlock وسرعتها
- للمره التانيه لون ظهر الجهاز الغريب والحلو جدا زى ما انت شايف في الصور يعنى 😍

بس تعالا اقولك الزتونه كدا ..

واوى حطت كام حاجه في الموبايل دا تخلى اى حد بيدور على جهاز في السعر دا يحط النوفا 3i ضمن اول اختياراته ..
الذاكره الداخليه ال 128 جيجا .. ال 4 جيجا رام .. الشاشه بالأبعاد الجديده و النوتش .. تصميم الجهاز البريميم جداا ولونه اللى فعلا بيجذب ناس كتير جدا ليه .. أداء الكاميرا السيلفى الأكتر من ممتاز ...

النقط دى كلها خلت الموبايل تقريبا الإختيار الأول لناس كتير بتدور على جهاز في الفئة السعريه دى .. لكن واوى اغفلت حاجتين لازم اقولك عليهم .. عدم دعم الجهاز للشحن السريع .. و انه جاى بمنفذ مايكرو USB القديم مش ال USB-C ..

وبطبيعه الناس اللى الشركه بتستهدفهم بالفئة السعريه دى ف تقريبا اكتر من 95% منهم مش هتهتم فعلا بوجود ال USB-C او الشحن السريع في الجهاز

اما لو الحاجتين دول فارقين معاك قوى ف احنا مبعدناش .. عندك االنوفا 3 العادى بسعر اغلى شويه ولكن هتاخد اداء اعلى وكاميرا افضل و شحن سريع و usb-c .. ف يعنى الشركه بتقولك دا موجود ودا موجود واختار اللى انت عاوزه  😂

انا كدا خلصت .. دا كان ببساطه رأيي في النوفا 3i .. شوف ايه اولوياتك في الموبايل .. ولو لقيت ان الجهاز فعلا محققهالك اشتريه لانه هيقدملك تجربه مستخدم ممتازه جدا وهتقدر تعتمد عليه

أخيرا لو عندك اى سؤال بخصوص الموبايل اكتبه تحت في الكومنتات .. وهرد عليك في اقرب وقت

Review By : Mohamed El-Khayat

سعر موبايل Huawei Nova 3i

السعر 5850 جنية للنسخة 128 مع 4 جيجا رام .
في السعودية 1300 ريال لنفس النسخة .

تعليقات
تعليق واحد
إرسال تعليق
  • 👤 Unknown

    ليه تفاصيل الخلفيه ف السيلفي بتبقى كأنها مشوشه جدا وتبان دقتها أقل من الخلفيه ؟!