دشن عدد من أولياء الأمور يدشنون حملة جديدة ضد طارق شوقي وزير التربية والتعليم علي موقع التواصل الاجتماعي "فيس بوك" تحت عنوان"انت أكيد من عالم تاني".
حملة أنت أكيد من عالم تاني ضد شوقي
وإليكم نص البوست المتداول من صفحات أولياء الأمور:-كلنا اتعشمنا خير فى سيادة الوزير وقولنا بس هو ده منقذ الاجيال
كلنا ساندناه وقولنا برافو على القرارات الحكيمة اللى طول عمرنا طالبنا بيها
لكن لما يحصل ان الوزارة تتخذ قرارات وتفشل فيها نتيجة التسرع وعدم الدراسة الجيدة وسوء التخطيط هنا بقى مش بنسقف ومش بنقول برافو .. هنا بنقول STOP
بنقول احنا اهو يا فندم اسمعنا . احنا اهو شوفنا .. يبقى من حقنا نتسمع ونتشاف ويتصدق كلامنا لاننا احنا اللى جوا المطبخ المعكوك من زمان
احنا اولياء الامور اللى عانينا بسبب قرارات متسرعة وغير مدروسة وطول عمرنا كنا فئران تجارب كلها كانت فاشلة بلا استثناء
احنا اللى ولادنا فى مدارس مختلفة بأنظمة مختلفة واحنا اللى عارفين عيوب كل نظام من الانظمة دى .. واحنا اللى عارفين ومتأكدين ان قراراتكوا دى قرارات على الورق مفيش مدارس بتلتزم بيها .. من اول الميدتيرم المنتهى اللى برضو مكانش منتهى بسبب عدم التزام المدارس .. مرورا بمصروفات المدارس الخاصة اللى مبتلتزمش بقرارات .. واخرها اهو المدارس بتمتحن ولادنا تحريرا وبتحط الدرجات دى كدرجات اعمال السنة (رغم صدور منشور رسمى يمنع ذلك)
ده بقى معناه ان الوزارة فى عالم .. والمدارس فى عالم تاااانى
ومعناه كمان اننا كأولياء امور وطلاب ومدرسين فى عاااالم تاااااالت تماااما
نظام جديد ايه وتابلت ايه ونت ايه اللى هيتوفر !! ومدرسين ايه اللى اتدربوا !! ومدارس ايه اللى اتوفرت فيها الامكانيات وكل حاجة هتبقى تمام خلال 10 شهور ؟؟؟!!!!!!
انا عايزة افهم انتوا بتضحكوا علينا ولا على نفسكوا !!!!!!!!
معالى الوزير
سيادتك مستغرب ان اولياء الامور ما زالوا بيعارضوا النظام الجديد على اساس انه هيلغى مكتب التنسيق فى حين ان نظام القبول بالجامعات بيبقى من اختصاص وزارة التعليم العالى
والله يا فندم احنا ماجبناش حاجة من عندنا .. سيادتك اللى صرحت ان النظام الجديد هيكون فيه نظام القبول بالجامعات بالقدرات ومع ذلك تمااام جداااا وصلت يا فندم وعرفنا اللى هيبقى فيها .. وزارة التربية والتعليم رمت الكورة فى ملعب وزارة التعليم العالى اللى يوم ما هتصدر القرار ده هيبقى منتهى
وبدل ما يحصل حوار مجتمعى حقيقى عشان نسمع بعض ونتناقش فى كل عيوب النظام اللى ممكن تواجهنا .. مبنسمعش غير ان السيد الوزير زعلان اننا بنهاجمه .. والسيد الوزير مستاء اننا ضده
يا فندم احنا ولا بنهاجم ولا مع ولا ضد ولا بنتهكم على حد
احنا عيونك الحقيقية اللى المفروض تشوف بيها بدل ما كل حاجة بتوصلك انها تمام يا فندم وسيادتك على مكتبك فى عالم الخيال