فتح صندوق هواووي ميت عشرة برو ، مميزات وعيوب ميت عشرة برو Huawei Mate 10 Pro
فتح صندوق هواووي ميت عشرة برو ، مميزات وعيوب ميت عشرة برو Huawei Mate 10 Pro
هواوى لما أعلنت عن الجهاز Huawei Mate 10 Pro  هو وال Mate 10 العادى كنت مستغرب جدا بسبب حاجتين .. الشاشه اللى كانت دقتها اعلى في النسخه العاديه مش البرو
و كمان موضوع البصمه اللى موجود في وش الجهاز في النسخه العاديه و في ظهره للنسخه البرو و اللخبطه اللى كانت حاصله و ليه هما مش زى بعض أصلا !

كل التفاصيل دى هنتكلم عنها في الريفيو، بس تعالا اقولك على السريع كدا مواصفات الموبايل اللى لازم ابدأها بالشاشه ال AMOLED اللى دقتها FullHD+ و كمان الكاميرتين الخلفيتين الى بفتحة عدسه f1.6 و البروسيسور الثماني النواه Kirin970 اللى فيه شريحه لعمليات الذكاء الإصطناعى و مرورا بال 6 جيجا رام و الذاكره الداخليه ال 128 جيجا و أخيرا البطاريه ال 4000 ميللى امبير 

بس قبل ما نتكلم عنهم بالتفصيل تعالا نشوف علبة الموبايل الأول بيكون فيها ايه ؟

Inbox Huawei Mate 10 Pro فتح صندوق هواووي ميت 10 برو

العلبه بنفس التقسيمه بتاعة علبة ال Mate 9 وبتديك تقريبا نفس تجربه ال Unboxing و هتلاقى فيها التالى : 
- ال Mate 10 Pro
- جراب حماية للموبايل لكنه سيليكون مش بلاستيك 
- شاحن Super Charge 
- وصلة USB-C 
- سماعات USB-C بردو عشان مفيش 3.5mm audio jack 
- دبوس لدرج الشريحة 
- الكتالوج
فتح علبة Huawei Mate 10 Pro
فتح علبة Huawei Mate 10 Pro

مبدئيا أبعاد الجهاز مناسبة جدا .. طوله 15.4 سنتى وعرضة 7.4 سنتى و سمكه 7.9 ميللى بس .. ووزنه 178 جرام .. 

الموبايل المره دى جاى بتصميم زجاج مش معدن زى ما كنا بنشوف اجهزه واوى اللى قبل كدا مع احتفاظه طبعا بالإطار المعدن اللى موجود جوانب الجهاز 

اما مسكة الجهاز في الإيد احلى بكتير من اى جهاز في سلسلة ال Mate لان عرضه اقل بسبب ابعاد الشاشه الجديده و دا بارغم من ان الشاشه مازالت بنفس حجمها ال 6 بوصة 

على يمين الجهاز هتلاقى زرار الباور اللى عليه نقشه بسيطه و فوقيه ازرار التحكم في الصوت و على الشمال بقى هتلاقى درج الشريحين اللى لأول مره مش بيدعم كروت الميمورى .. ماهو الجهاز 128 جيجا عاوز كارت ليه بقى ؟! :D 

أما ظهر الجهاز هتلاقى فيه الكاميرتين و الفلاش و مكان ال Laser autofocus و تحتهم هتلاقى البصمه .. ولكن ظهر الجهاز المره دى كله زجاج و واخد كيرف على ال 4 جوانب بتاعته مخليه المسكه بتاعة الموبايل مريحه جدا بس الإزاز بيخلى الموبايل يتزحلق بطريقة رهيبه .. ف لازم ولابد و حتماً :D تستخدم الجراب اللى جاى مع الموبايل او تشتريله اى جراب على زوقك
Huawei Mate 10 Pro
تصميم Huawei Mate 10 Pro

 ولو كملنا باقى جوانب الجهاز هتلاقى تحت السماعه و ال USB-C و كمان 2 ميكروفون ومن فوق بقى هتلاقى ميكريفون تالت وجنبه منفذ ال IR اللى بتقدر تتحكم من خلاله في الأجهزه اللى موجوده عندك في البيت

كمان فوق الشاشه هتلاقى سماعة المكالمات والكاميرا و مستشعرات الإضاءة والقرب ولمبة الإشعارات

شاشة Huawei Mate 10 Pro

شاشة الموبايل المره دى واخده 80.9% من واجهة الموبايل ودا اتجاه الشركات عموما في 2017 .. و لكن الشاشه المره دى نوعها AMOLED و دا معناه ان الشاشه بتعرض الألوان بشكل حلو جدا جدا، هتبقى حابب انك تبصلها أغلب الوقت بالإضافه الى ان درجة اللون الأسود هتكون اسود بجد، وبالتالى دا بيديك امكانيه لتشغيل ميزة ال Always on display .. 

أما سطوع الشاشه في الشمس كان كويس لكن كان ممكن يكون افضل 
.. و بليل بتقدر تغمقها لدرجه كبيره عشان لو انت في مكان ضلمه الإضاه متبقاش مزعجه ليك .. 

لكن السؤال هنا هي ليه الشاشه جايه بدقة FullHD+ مش QuadHD زى أجهزه كتير في السعر دا ؟؟؟ 

ودى نقطه كنت بفكر فيها مجرد ما الشركه أعلنت عن الموبايل .. لكن مع التجربه مكانش فيه اى مشاكل مع الشاشه .. كل حاجه ظاهره بوضوح و لو حاولت اقرب من الشاشه مش بلاحظ البكسلات .. لان أصلا الشاشه بالحجم و الدقه دى بيدوك كثافة بيكسلات 401 بيكسل في الانش .. و عينك انت كبنى ادم مش هتلاحظ البيكسلات الا لو كانت 300 بيكسل في الانش او اقل، ف موضوع الدقه مكانش مشكله تماما 

دا غير ان ليه جانب ايجابى على الناحيه التانيه وهو انه هيقلل من استهلاك البطاريه و دا موجود فعلا .. وهتكلم عليه فى الجزء الخاص بالبطاريه
شاشة Huawei Mate 10 Pro
شاشة Huawei Mate 10 Pro

ال Mate 10 pro مميز في النقطه دى لسبب .. ان الجهاز بيدعم شبكات ال 4G على كلا الشريحتين في نفس الوقت من غير ما تبدل ما بينهم و دى نادرا ما بنلاقيها عموما في اى موبايل .. 

أما صوت المكالمات في الموبايل كان واضح جدا جدا .. وبيقدر يعزل صوتك للى بيكلمك أكتر من الطبيعى بتاع الأجهزه التانيه بسبب شريحة ال NPU اللى موجوده في البروسيسور "هنشرحها في الجزء الخاص بالأداء" 
ولكن اللى لفت انتباهى فى الموبايل حاجتين .. واحده منهم ميزه و التانيه عيب 

- العيب و هو ان الموبايل بيدعم البلوتوث بإصدار 4.2 مش 5.0 ودى مش مشكله كبيره .. كل الفكره ان اللإصدار 5.0 كان هيديك تغطيه أوسع للبلوتوث من غير تقطيع و كمان كان هيسمحلك بإنك توصل سماعتين بلوتوث تقدر تسمع عليهم نفس الحاجه في نفس الوقت ..لكن بالرغم من ان دا مكانش هيأثر في اختيار الموبيايل او في تجربتك ليه .. الا انى كنت أتمنى انه يكون موجود .. 

- الميزة بقى و هي في ال GPS اللى كان ممتاز ولكن فيه ميزه اضافيه وهى انك لو كنت في مكان مبيوصلهوش إشارة ال GPS زى انك تكون ماشى في نفق تحت الأرض .. الموبايل بيقدر انه يحدد انت في انهى حته في النفق على أساس سرعتك اللى كنت ماشى بيها قبل كدا خلال الرحله و على أساس اى بيانات هو مسجلها لأى رحله انت عملتها في نفس الطريق دا قبل كدا و دى فكره صايعه

بطارية Huawei Mate 10 Pro

الموبايل دا بطاريته غريبه جدا .. هي 4000 ميللى امبير ولكن انا حاسس انها اكبر من كدا و الشركه مش قايله 😂 
انا فضلت ماسك الموبايل بجرب كل حاجه فيه استخدام تقيل .. كاميرا و العاب و نت Wifi وساعات 4G .. و الجهاز عمل معايا Screen on time اربع ساعات ونص والبطاريه لسه باقى فيها 40% !!! 

وبعد كدا كملت استخدام الموبايل بشكل طبيعى مش تقيل كان تصفح نت و يوتيوب و شويه مكالمات .. والجهاز عمل معايا 7 ساعات وتلت Screen On Time و دا حلو جدا جدا على جهاز فلاجشيب بالأداء دا 

لكن لاحظت حاجه .. ان ال Always on display بتزود من استهلاك البطاريه بشكل ملحوظ و انت على ال StandBy mode و دا متوقع عموما زى ما بيحصل في اجهزه سامسونج اللى فيها نفس الخاصيه دى 

أما بقى سرعة الشحن ف دى كمان كانت ممتازه جدا 
انا حطيت الجهاز في الشاحن و مسكت ال ستوب ووتش :D و فضلت احسب و لقيت التالى : 
- الجهاز شحن 50% في 26 دقيقه 
- و 60% في 32 دقيقه "الشركه كانت قايله 30 دقيقه، ولكن لو انا كنت قافل الموبايل اظن كان هيبقى 30 فعلا" 
- و شحن 90% ف 62 دقيقه 
- وأخيرا شحن 100% في 88 دقيقه بالضبط .. يعنى اقل من ساعه و نص "الرقم الرسمى من الشركه هو 80 دقيقه" 

فالشحن السريع بتاع الجهاز حلو جدا ..مقدرش انكر ان فيه اجهزه بتشحن بنفس السرعه .. لكن حجم بطاريتها مش بيتعدى ال 3600 مللى امبير .. لكن ال Mate 10 Pro بطاريته 4000 وشحن في نفس السرعه و بالتالى معدل الشحن عنده اسرع .. ودى من افضل الحاجات اللى موجوده في الجهاز
بطارية Huawei Mate 10 Pro
بطارية Huawei Mate 10 Pro

قبل ما أخش في تفاصيل الواجهة احب اقولك ان دا اول موبايل ينزل بأندرويد اوريو من الشركه .. وبما ان اندرويد اوريو رقمه 8.0 ف واوى قررت انها تنزل معاه الإصدار التامن 8.0 من واجهتها ال EMUI 

هتقولى طيب هو اصدار الواجهه ال 6.0 و ال 7.0 راحوا فين .. هقولك راحوا مع النوت ال 6 و الويندوز 9 😂 

عادة واوى لما بتعلن عن اصدار جديد لواجهتها غالبا بيكون فيه تغيرات كبيره او جذريه .. لكن الفرق دا مش موجود بشكل كبير بين اخر اصدارين للواجهه ال 5.1 و ال 8.0 ... 

لكن دا ميمنعش وجود بعض التغيرات المميزات الجديده زى مثلا :
- على ال Home Screen لما يكون فيه تطبيق جايبلك اشعارات .. تقدر بمجرد انك تدوس ضغطه طويله على التطبيق تظهرك الإشعارات اللى جايالك من خلاله 
- فيه كمان ميزه ال Apps Shortcuts واللى بتقدر من خلالها انك لو دوست على اى تطبيق على الهوم سكرين ضغطه طويله يظهرك اختيارات من التطبيق نفسه .. مثلا لو عملت دا مع الكاميرا هيظهرلك انك ممكن تفتح الكاميرا على أوضاع تصوير مختلفه زى السيلفى او الفيديو و الصور للكاميرا الخلفيه و خلافه 
- تقدر تتحكم في دقة الشاشه عشان توفر في البطاريه 
- إضافة ال Always on display بسبب وجود الشاشه ال AMOLED
- ال Navigation Dock و دى كوره بتظهر على الشاشه وفكرتها انها بتحل محل ال Navigation bar ف بتقدر ترجع خطوه بيها .. او ترجع للشاشه الرئيسيه او حتى تفتح قائمة ال Recent Apps من خلالها .. 

دا طبعا مع المميزات المتراكمه اللى كانت موجوده في واجهة واوى قبل كدا زى : 
- خاصية ال Split screen 
- ايماءات الضغط على الشاشه .. زى لو خبطت على الشاشة مرتين بصباعك جامد هياخد سكرين شوت ولو اتحركت ورسمت حرف معين ممكن يفتح الكاميرا او مشغل الموسيقى 
- تقدر من خلال مستشعر البصمه انك تنزل شريط الاشعارات او تقلب الصور وترد على المكالمات وتقفل المنبه وحتى تلقط صور وانت فاتح الكاميرا 
- الشريط اللى تحت Navigation bar ممكن تعدل وترتب الايقونات اللى فيه زى ما انت عاوز و ممكن تضيف فيه اختيار عشان تخفيه وتظهره وقت ما انت عاوز 

الواجهه عموما معنديش اى تعليقات عليها .. كانت سريعه و سلسله و مفهاش اى مشاكل
مميزات Huawei Mate 10 Pro
مميزات Huawei Mate 10 Pro

دا مش اول موبايل من واوى ينزل ب 6 جيجا رام.. كان فيه قبله ال p10 plus و لكن ال 6 جيجا رام بيخلوا اداء الجهاز حلو جدا .. التطبيقات اللى بتفتحها بتفضل مفتوحه و مش بتحمل تانى لما ترجعلها .. 

حط دا بجانب المعالج الجديد بتاعهم ال Kirin 970 المبنى على دقة تصنيع 10 نانو .. هتلاقى الجهاز بيطير في كل حاجه انت بتعملها عليه مهما فتحت عدد كبير من التطبيقات ... 

لكن ثانيه واحده .. لو فاكر واوى كانت عملت مؤتمر مخصوص أعلنت فيه عن ال Kirin 970 دا قبل ما تعلن عن ال Mate 10 أصلا .. وقالت ان دا اول معالج فيه شريحة مخصوصه لمعالجه عمليات الذكاء الإصطناعى .. لكن هل انا لاحظت دا في الموبايل فعلا ؟؟ 

في الأول خلينى اقولك ايه المقصود بعمليات الذكاء الإصطناعى .. 

ببساطه العمليات دى بتكون عمليات معقده بتعتمد على معطيات بتتغير بإستمرار و بيتم معالجتها بشكل متوازى فى نفس الوقت عشان تقدر تطلع في الأخر بنتيجه "ذكيه" الى حد ما يعنى :D 

مش فاهم صح ؟ 
هبسطهالك :D 
لو قولتلك حل المسأله دى 
ما هو ناتج مجموع العمليتين الأتيتين 
5+3 
و 
7+2
ف انت هتعمل الخطوات دى عشان تطلع النتيجه 
-هتجمع ال 5 و ال3 و هتطلع النتيجه 8 و تحتفظ بيها في ذاكرتك 
- وبعد ما تخلص تجمع ال 7 وال 2 و تطلع النتيجه 9 و تحتفظ بيها في ذاكرتك 
- و بعد ما تخلص تجمع النواتج اللى طلعتها 8+9 و تطلع النتيجه النهائيه = 17 
اللى انت عملته دا 3 خطوات و هو اللى بيعمله البروسيسور العادى 

اما شريحه الذكاء الإصطناعى مبتعملش كدا لانها بتعمل الأتى: 
- بتحسب النتيجه بتاعة ال 3 و ال 5 .. و في نفس الوقت بتحسب نتيجه ال 7 و ال 2 "بقول في نفس الوقت" 
- وبعد كدا تجمع النتائج مع بعض وتقولك على النتيجه النهائيه 
و اللى حصل هنا هو خطوتين بس مش 3 و دا اللى بيحصل فى معالجات الذكاء الإصطناعى 

لو هتقولى انها مش هتفرق .. هقولك لأ ,, انا ضربت مثال ب عمليتين بس .. لكن لو كان المثال دا فيه 1000 عمليه معالجه .. هتلاحظ فرق خرافى في الأداء .. مابالك بمليون عمليه .. الفرق هيكون ازاى ؟!! 

ف الفكره ببساطه ان الشريحه اللى موجوده في ال Kirin 970 بتاعة الذكاء الإصطناعى فيها انويه كتير .. و دا بيمكنها انها تعمل عمليات معالجه كتير بشكل متوازى "في نفس الوقت يعنى" و تطلع بالنتائج بشكل اسرع .. و عموما الموضوع د ليه تطبيقات كتير جدا هتبان مع الوقت و جوجل هتدعم الكلام دا بتطبيقات خاصه ليه

دى الفكره ببساطه .. لكن الكلام دا كله حتى هيبان معاك في الموبايل في ال 3 حاجات دى : 
- لما تيجى تصور بالكاميرا هتلاقى الموبايل بيقدر يتعرف على الحاجه اللى بتصورها و بيظبط افضل اعدادات تصوير ليها 
- لما تيجى تتكلم في التليفون الموبايل هيقدر يميز صوتك انت حتى لو واطى جدا عن الدوشه و هيقدر يعزله عن باقى الأصوات 
- هتلاحظ دا في أداء الموبايل عموما و اللى هيكون اسرع في اى عمليه بتعتمد على الذكاء الإصطناعى وكمان هتلاحظه في استهلاك البطاريه الأقل بسبب الإستهلاك الأقل للطاقه في معالجات الذكاء الإصطناعى عموما
Huawei Mate 10 Pro
عيوب Huawei Mate 10 Pro
اما أداء الجهاز في الألعاب فكان مفيهوش اى تقطيع نهائيا .. دا بسبب معالج الرسوميات ال Mali G72 MP12 و دا فيه 12 نواه !
و كمان بسبب ان شاشه الموبايل FullHD+ مش QuadHD و بالتالى معالج الرسوميات بيعالج كمية داتا اقل في كل ثانيه .. و بالتالى دا هيضمنلك أداء سلس جدا في الألعاب

الكاميرا الأمامية Huawei Mate 10 Pro

الكاميرا اللى قدام فى الجهاز هي 8 ميجا بيكسل بفتحة عدسة f2.0 وصورتها كويسه جدا كعادة أجهزه واوى وبتصو فيديو لحد 1080p .. وفيها ميزة جديده اسمها 3D بانوراما ودى بتقدر تصور صوره وتحرك الموبايل حوااليك و لما تيجى تعرضها في الاستوديو و وتحرك الموبايل يمين و شمال تلاقى الصوره بتتحرك معاك .. دا بالإضافه للبانوراما العاديه و ال Time lapse وباقى اوضاع التصوير المعتاده

عموما جودة الكاميرا كويسه في كل أوضاع الإضاءه تقريبا .. الا بليل كان فيها شويه نويز بس فلاش الشاشه لما بينور قبل التصوير بيخلى الصوره تظهر افضل بكتير
كاميرا Huawei Mate 10 Pro

الكاميرا الخلفية Huawei Mate 10 Pro

اما الكاميرا الخلفيه .. او الكاميرتين عشان أكون ادق :D
بيجوا بالتعاون مع لايكا زى ما بيحصل مؤخرا في اجهزه واوى الفلاجشيب .. 
لكن المره دى الكاميرتين بفتحة عدسه f1.6 و دى اكبر فتحة عدسه نزلت في موبايل حتى الأن 

الكاميرا الألوان دقتها 12 ميجابيكسل و فيها OIS
أما الكاميرا التانيه 20 ميجابيكسل ابيض و اسود و مفهاش OIS 

الموبايل الكاميرا بتاعته عبقريه .. حلوه جدا في كل ظروف الإضاءة تقريبا 
في الصبح الألوان بتكون ظاهره بشكل ممتاز وال Dynamic range بتاع الصوره بيكون ممتاز والتفاصيل باينه و الأهم بليل بتكون الصور ظاهره بشكل ممتاز مع اقل وجود ممكن للنويز .. و طبعا تصوير الفيديو ال 4K موجود .. 

واوى كمان ضافت ميزة ال 3D بانوراما في الكاميرا الخلفيه و طبعا ال portrait mode وتصوير Monochrome دا غير المميزات اللى موجوده من قبل كدا زى ال Time-lapse وال Slow Motion والLight painting وال HDR دا غير كمان ال Pro Mode عشان تتحكم في الكاميرا براحتك 

الكاميرا عموما ممتازه جدا معنديش عليها اى ملحوظات الا ان في بعض ظروف الإضاءه الألوان بتكون مشبعه "ظاهره" في الصوره اكتر من اللازم .. لكن غير كدا كانت ممتتازه جدا

هتلاقى هنا http://bit.ly/2zD0p1Q 
امثله متصوره بكاميرا الموبايل الأماميه و الخلفيه

خلاصة Review  Huawei Mate 10 Pro 

عيوب Huawei Mate 10 Pro

- ان الجهاز كان يدعم الشحن اللاسلكى لانه كله زجاج دلوقتى و الامكانيه أصبحت موجوده
- انهم كانوا يحتفظوا بال 3.5mm audio jack 
- ان دقة الشاشه بالرغم من انها كويسه جدا بس كنت أتمنى انها تكون QuadHD 
- ان يكون فيه وصله في العلبه تخلينى استخدم السماعات العاديه ال 3.5 مللى مع التليفون 
- ان الجهاز كان يدعم كارت ميمورى "مش قوى لان الجهاز 128 جيجا" 
- ان الجهاز يجى بإصدار بلوتوث 5.0 

مميزات Huawei Mate 10 Pro

- التصميم الزجاج حلو و شيك جدا .. انا نفسى استخدمه من غير الجراب بس خايف 
- اداء سينسور البصمه سريع ... لدرجه ان انا أحيانا بحس انه مش بيقرا البصمه و انها اشتغاله بس لما بجرب صباع تانى مبيفتحش 
- ال 6 جيجا رام و الذاكره الداخليه ال 128 
- سماعة المكالمات بتشتغل لما بتشغل مزيكا مع السماعه العاديه .. و الاتنين مع بعض صوتهم عالى جدا ونقى
- الابعاد الجديده للشاشه 18:9
- اداء الجهاز ثم أداء الجهاز ثم أداء الجهاز :D 
- نوع الشاشه انه AMOLED مش LCD 
- ميزة ال PC Mode واللى مش بتحتاج الا وصله عشان توصل الموبايل بال HDMI في التليفيزيون وخلاص 
- الموبايل جاى ب اندرويد اوريو من العلبه 
- مقاومة الموبايل للمياه و الاتربه بشهادة IP67 
- دعم ال 4G على الشريحتين في نفس الوقت 

بص من الأخر .. تجربه الموبايل ممتعه جدا وهتحب انك تمسك الموبايل و تستخدمه كتيير، و كل اللى انت محتاجه الموبايل هيقدمهولك بسرعه و بسهوله ... الأداء ممتاز .. الكاميرا رهيبه .. البطاريه قويه ... مدة الشحن قليله .. دعم ال 4G على الخطين و مقاومة المياه 

دا كان ال #البوم_ريفيو بتاع الـ Huawei Mate 10 Pro :D بكل تفاصيل استخدامنا ليه .. ولو عندك اى اسئله عن اى حاجه في الجهاز .. اكتبها فى التعليقات و هنجربها و نرد عليك فى اقرب وقت ;) 


مقالات مرتبطة

تعليقات
ليست هناك تعليقات
إرسال تعليق
    إرسال تعليق